काठमाडौं, साउन ११ — नेपालको पहिलो आधुनिक सडक सुरुङमार्ग नागढुंगा–सिस्नेखोला सुरुङमार्ग सोमबार औपचारिक रूपमा उद्घाटन भएसँगै देशको सडक यातायात तथा पूर्वाधार विकासमा नयाँ युगको सुरुवात भएको छ। जापान सरकारको सहयोगमा निर्माण गरिएको यो परियोजनालाई नेपाल–जापान सहकार्यको ऐतिहासिक उपलब्धिका रूपमा समेत चित्रण गरिएको छ।
उद्घाटन समारोहमा पूर्वाधार विकास मन्त्रालय, नेपालका लागि जापानी दूतावास तथा जापान अन्तर्राष्ट्रिय सहयोग नियोग (जाइका) का उच्च अधिकारीहरूले सुरुङमार्गलाई नेपालको आधुनिक पूर्वाधार विकासको ऐतिहासिक कोसेढुंगाका रूपमा व्याख्या गरेका छन्।
पूर्वाधार विकास मन्त्रालयका सचिव गोपालप्रसाद सिग्देलले सुरुङ सञ्चालनसँगै नेपालमा आधुनिक पूर्वाधार विकासको नयाँ अध्याय सुरु भएको बताए। राजनीतिक इच्छाशक्ति, प्राविधिक सहकार्य र धैर्य भए नेपालले जटिल तथा महत्त्वाकांक्षी पूर्वाधार परियोजनाहरू सफलतापूर्वक कार्यान्वयन गर्न सक्ने उदाहरण नागढुंगा सुरुङ बनेको उनको भनाइ थियो।
निर्माणका क्रममा नेपाली र जापानी इन्जिनियरहरूले हिमाली भूगर्भीय जटिलता, कोभिड–१९ महामारी तथा कठिन भौगोलिक अवस्थाबीच संयुक्त रूपमा काम गरी आयोजना सफल बनाएको उनले उल्लेख गरे। “यो नेपालको पहिलो आधुनिक सडक सुरुङ हो, तर अन्तिम होइन,” भन्दै आगामी दिनमा थप सुरुङ परियोजनाहरू अघि बढाइने संकेत पनि उनले दिए।
यात्रा समय घट्ने, जाम र पहिरोको जोखिम कम हुने
नागढुंगा–सिस्नेखोला सुरुङमार्ग सञ्चालनमा आएपछि काठमाडौं प्रवेश तथा बाहिरिने मुख्य मार्गको यात्रा समय उल्लेखनीय रूपमा घट्ने अपेक्षा गरिएको छ। सिस्नेखोला–बलम्बु खण्ड केही मिनेटमै पार गर्न सकिने भएकाले वर्षौंदेखिको ट्राफिक जाम, तीव्र घुम्ती र वर्षायाममा हुने पहिरोको जोखिमबाट यात्रुले राहत पाउने विश्वास सरकारी अधिकारीहरूको छ।
नेपाल–जापान सम्बन्धको प्रतीक
नेपालका लागि जापानी राजदूत माएदा तोरूले सुरुङमार्गलाई नेपालको पूर्वाधार विकासको इतिहासमा ऐतिहासिक उपलब्धि र नेपाल–जापान मैत्री सम्बन्धको सशक्त प्रतीक भएको बताए।
नेपाल र जापानबीच कूटनीतिक सम्बन्ध स्थापना भएको ७०औँ वर्षकै अवसरमा यो आयोजना सञ्चालनमा आउनु विशेष महत्त्वपूर्ण भएको उनको भनाइ थियो।
राजदूत तोरूका अनुसार हिमाली भूगर्भ, सक्रिय भूकम्पीय क्षेत्र, वर्षायामको पहिरो तथा जमिनको चलायमान अवस्थाजस्ता चुनौतीबीच जापानी विज्ञहरूको अनुभव र नेपाली प्राविधिक तथा श्रमिकहरूको योगदानले आयोजना सफल भएको हो।
उनले जापानमा निर्माण भएका करिब १५ हजारभन्दा बढी सुरुङमार्गबाट प्राप्त प्राविधिक अनुभव यस परियोजनामा प्रयोग गरिएको उल्लेख गर्दै नेपाली इन्जिनियरहरूले सुरुङ निर्माण, सुरक्षा प्रणाली तथा सञ्चालनसम्बन्धी महत्त्वपूर्ण अनुभव हासिल गरेको बताए।
जाइकाः दुई देशको सहकार्यको उत्कृष्ट उदाहरण
जापान अन्तर्राष्ट्रिय सहयोग नियोग (जाइका) का अध्यक्ष डा. तानाका अकिहिकोले नागढुंगा–सिस्नेखोला सुरुङमार्गलाई नेपाल र जापानबीचको दीर्घकालीन विकास साझेदारीको उत्कृष्ट उपलब्धि भएको बताए। भविष्यमा पनि नेपालको दिगो पूर्वाधार विकासमा जापानको सहकार्य निरन्तर रहने उनको प्रतिबद्धता थियो।
मुख्य तथ्य
- नागढुंगा–सिस्नेखोला नेपालको पहिलो आधुनिक सडक सुरुङमार्ग हो।
- आयोजना जापान सरकारको सहुलियतपूर्ण ऋण तथा जाइकाको प्राविधिक सहयोगमा निर्माण गरिएको हो।
- सुरुवाती चरणमा सुरुङ सीमित रूपमा सञ्चालन गरिने र सुरक्षा परीक्षणपछि क्रमशः सबै चारपांग्रे सवारीका लागि खुला गरिने योजना छ।
