न्युयोर्क । पश्चिम एसियामा व्यावसायिक जहाजमाथि आक्रमणका घटना बढ्दै जाँदा र स्ट्रेट अफ होर्मुज पुनः खुलाउने विषयमा भइरहेको वार्ता निष्कर्षमा पुग्ने सम्भावना कमजोर बनेपछि अन्तर्राष्ट्रिय बजारमा कच्चा तेलको मूल्य बढेको छ।
बुधबार लन्डनस्थित आईसीई एक्सचेन्जमा अन्तर्राष्ट्रिय बेञ्चमार्क ब्रेन्ट क्रुडको मूल्य २ प्रतिशतभन्दा बढीले बढेर प्रतिब्यारेल ९० डलर नजिक पुगेको हो। ३ जीएमटीसम्म अक्टोबर डेलिभरीको ब्रेन्ट क्रुड ८९ डलर ६१ सेन्टमा कारोबार भइरहेको थियो।
यो मूल्य फेब्रुअरीको अन्त्यतिर अमेरिका र इजरायलले इरानमाथि आक्रमण गर्नुअघिको तुलनामा करिब २४ प्रतिशत बढी हो।
सिड्नीस्थित केसीएम ट्रेडका प्रमुख बजार विश्लेषक टिम वाटररका अनुसार बजारले अझै सम्झौताको सम्भावना पूर्ण रूपमा अस्वीकार गरेको छैन। तर, वार्तामा देखिने प्रगति नहुँदा सम्झौता हुने विश्वास भने कमजोर हुँदै गएको छ।
उनका अनुसार वार्ता लामो समयसम्म निष्कर्षविहीन रहँदै गएमा र पक्षहरूका माग जटिल बन्दै गएमा व्यावहारिक सम्झौता हुने सम्भावनाप्रति बजारको शंका थप बढ्नेछ।
यसैबीच, यमनको बाब अल–मन्डेब जलडमरूमध्यमा व्यावसायिक जहाजमाथि इरान समर्थित हुथी विद्रोहीहरूले गरेको मिसाइल आक्रमणमा ६ जनाको मृत्यु भएको यमन सरकारले जनाएको छ। प्रारम्भिक आक्रमणपछि उद्धारमा खटिएका सुरक्षाकर्मीमध्ये दुई जनाको समेत मृत्यु भएको बताइएको छ।
अमेरिकी केन्द्रीय कमान्ड (सेन्टकम)का अनुसार इरानी बन्दरगाहमाथि अमेरिकाले लगाएको नाकाबन्दी तोड्ने प्रयास गरेपछि पनामा झन्डा भएको कार्गो जहाजमाथि आक्रमण गरिएको थियो।
होर्मुजमा जहाज आवागमन घट्यो
इरानमाथि युद्ध सुरु हुनुअघि विश्वभर खपत हुने कुल तेलमध्ये करिब २० प्रतिशत तेल स्ट्रेट अफ होर्मुज हुँदै ओसारपसार हुने गरेको थियो। तर युद्धपछि यो महत्त्वपूर्ण जलमार्गमा जहाजको आवागमनमा ठूलो कमी आएको छ।
सोमबार मात्रै करिब १० वटा जहाज होर्मुज जलडमरूमध्य पार गरेका थिए। युद्ध सुरु हुनुअघि यही जलमार्गबाट दैनिक करिब १३५ वटा जहाज आवतजावत गर्ने गरेका थिए।
होर्मुज पुनः पूर्ण रूपमा खुलाउने विषयमा इरान र अमेरिकाबीच सहमति हुने सम्भावना कमजोर बन्दै गएपछि पछिल्लो एक सातादेखि अन्तर्राष्ट्रिय बजारमा तेलको मूल्य पुनः उकालो लाग्न थालेको छ।
होर्मुज विश्वको सबैभन्दा महत्त्वपूर्ण तेल ढुवानी मार्गमध्ये एक भएकाले यसको आवागमनमा आएको अवरोधले विश्व बजारमा आपूर्ति जोखिम र तेलको मूल्यमा थप दबाब सिर्जना गरेको छ।
