गुगलले सन् २०२७ र २०२८ मा फिनल्यान्डमा एआई पूर्वाधार निर्माणका लागि कम्तीमा १५ अर्ब अमेरिकी डलर लगानी गर्ने घोषणा गरेको छ। यो युरोपमा गुगलले एकैपटक गर्न लागेको अहिलेसम्मकै ठूलो लगानी हो।
एआई डाटा सेन्टरका लागि आवश्यक निरन्तर बिजुली सुनिश्चित गर्न गुगलले फिनल्यान्डको लोभिसा आणविक विद्युतगृह सञ्चालक फोर्टमसँग २२ वर्षे विद्युत खरिद सम्झौता गरेको छ। सम्झौताअनुसार गुगलले विद्युतगृहबाट उत्पादन हुने ऊर्जाको ५० प्रतिशतसम्म खरिद गर्नेछ।
अमेरिकाबाहिर आणविक ऊर्जाका लागि गुगलले गरेको यो पहिलो सम्झौता हो। गुगल र फोर्टमले फिनल्यान्डमा थप आणविक तथा नवीकरणीय ऊर्जा विकासको सम्भावना पनि अध्ययन गर्ने बताएका छन्।
एआई प्रणाली सञ्चालन गर्न ठूलो संख्यामा शक्तिशाली चिप निरन्तर चलाउनुपर्ने भएकाले डाटा सेन्टरमा अत्यधिक बिजुली आवश्यक पर्छ। चिपलाई चिसो राख्न पनि थप ऊर्जा चाहिन्छ। यही कारण गुगल, माइक्रोसफ्ट, मेटा, अमेजन र ओपनएआईजस्ता कम्पनीहरू एआईसँगै ऊर्जा पूर्वाधारमा पनि ठूलो लगानी गर्न थालेका छन्।
गुगलले फिनल्यान्डमा रहेको आफ्नो हामिना डाटा सेन्टर विस्तार गर्नुका साथै विद्युत सञ्जाल, स्वच्छ ऊर्जा र ब्याट्री भण्डारणसम्बन्धी परियोजनामा पनि लगानी गर्ने जनाएको छ।
यससँगै एआईको प्रतिस्पर्धा अब शक्तिशाली चिप र उत्कृष्ट मोडलको मात्र नभई भरपर्दो र पर्याप्त बिजुलीको प्रतिस्पर्धा समेत बन्न थालेको छ।
