काठमाडौँ — साताको दोस्रो कारोबार दिन सोमबार धितोपत्र बजार (नेप्से) मा तीव्र उतारचढावका बीच झिनो अंकको सुधार देखिएको छ। नेपाल स्टक एक्सचेञ्जका अनुसार नेप्से परिसूचक ५.०१ अंक (०.१७ प्रतिशत) ले वृद्धि भई २९३६.५६ विन्दुमा कायम भएको छ। अघिल्लो दिनको तुलनामा वृद्धिको रफ्तार सुस्त देखिए पनि कारोबार रकम १५ अर्ब ७८ करोड ६३ लाख रुपैयाँ नाघ्नुलाई लगानीकर्ताको उच्च सक्रियताका रूपमा लिइएको छ।
आज बजारमा कुल ३४२ कम्पनीका ३ करोड ८० लाख ७३ हजार ९ सय ४५ कित्ता शेयर किनबेच भए। हिजो आइतबार ५४ अंकको ठूलो छलाङ मारेको बजारमा आज नाफा सुरक्षित गर्ने (Profit Booking) प्रवृति हाबी हुँदा परिसूचकमा ठूलो बढोत्तरी हुन सकेन। यद्यपि, १५ अर्ब माथिको कारोबारले बजारमा पर्याप्त तरलता र खरिदकर्ताको बलियो उपस्थिति रहेको पुष्टि गरेको छ।
क्षेत्रगत रूपमा आज बजारमा मिश्रित प्रभाव देखियो। जलविद्युत र अन्य साना समूहमा लगानीकर्ता झुमिँदा ६ वटा कम्पनीको शेयर मूल्यमा १० प्रतिशतको हाराहारीमा सकारात्मक सर्किट लागेको छ। सालपा विकास बैंक, रिलायन्स स्पिनिङ मिल्स, सोलु हाइड्रोपावर, भुजुङ हाइड्रोपावर, मनकामना इन्जिनियरिङ र होटल फरेष्ट इनका लगानीकर्ताले करिब १० प्रतिशत नाफा कमाएका छन्। अर्कोतर्फ, बैंकिङ, विकास बैंक, होटल, बीमा र ट्रेडिङ समूहमा गिरावट आउँदा नेप्सेको समग्र वृद्धिमा केही अंकको धक्का लागेको छ।
प्राविधिक रूपमा हेर्दा, नेप्से २९०० को मनोवैज्ञानिक विन्दुभन्दा माथि टिक्नु सकारात्मक संकेत हो। उच्च कारोबारका साथ भएको यो झिनो वृद्धिले बजार ‘कन्सोलिडेसन’ चरणमा रहेको देखाउँछ। कुमारी बैंकको ६७ करोड २३ लाख रुपैयाँ बराबरको सर्वाधिक कारोबार हुनुले ठूला लगानीकर्ताको ध्यान अहिले पनि ‘ब्लु-चिप’ र उच्च भोलुम भएका बैंकहरूमै रहेको संकेत गर्छ।
बजारको यो प्रवृत्तिले लगानीकर्तामा अझै उत्साह कायमै रहेको देखाउँछ। यदि आगामी दिनमा बैंकिङ र बीमा क्षेत्रमा सुधार आएमा नेप्सेले ३००० को विन्दुलाई पुनः चुनौती दिने देखिन्छ। यद्यपि, केही सेक्टरमा आएको गिरावटले लगानीकर्तालाई सुरक्षित लगानी र क्षेत्र विविधीकरण (Portfolio Diversification) तर्फ सचेत गराएको छ।
