नुवाकोट । भोटेकोशी नदीमा आएको बाढीका कारण प्रभावित नुवाकोटको बट्टार र त्रिशूली बजार क्षेत्रमा विद्युत् सेवा पुनः सञ्चालनमा आएको छ।
नेपाल विद्युत् प्राधिकरणले वैकल्पिक व्यवस्थामार्फत बालाजु–त्रिशूली र चपली–देवीघाट ६६ केभी प्रसारण लाइनलाई ११ केभीमा चार्ज गरी प्रभावित क्षेत्रमा विद्युत् आपूर्ति सञ्चालनमा ल्याएको हो।
बाढीका कारण नियमित विद्युत् आपूर्ति प्रणालीमा क्षति पुगेपछि प्राधिकरणले उपलब्ध प्रसारण संरचनाको वैकल्पिक प्रयोग गर्दै प्रभावित क्षेत्रमा विद्युत् सेवा पुनःस्थापना गर्ने काम अघि बढाएको थियो।
उक्त व्यवस्थापछि बट्टार, त्रिशूली बजारलगायत आसपासका क्षेत्रमा पुनः विद्युत् आपूर्ति सुरु भएको प्राधिकरणले जनाएको छ।
प्राधिकरणले बाढीबाट क्षतिग्रस्त विद्युत् संरचनाको मर्मत तथा पुनःस्थापनाको कामलाई तीव्रता दिँदै प्रभावित सबै क्षेत्रमा विद्युत् सेवा नियमित बनाउने प्रयास जारी रहेको जनाएको छ।
