प्रतिनिधि सभा बैठकमा अबदेखि सांसदहरूले कालो चस्मा लगाएर उपस्थित हुन नपाउने भएका छन्। सभामुख Dol Prasad Aryalले कार्यव्यवस्था परामर्श समिति बैठकमा यस्तो निर्देशन दिँदै प्रमुख सचेतक र सचेतकहरूलाई आफ्ना दलका सांसदहरूलाई जानकारी गराउन आग्रह गरेका हुन्।
सभामुखका अनुसार संसद बैठकमा कालो चस्मा लगाउने विषयमा बारम्बार प्रश्न उठ्ने गरेको र संसदको गरिमा तथा मर्यादा कायम राख्न यस्तो व्यवस्था गर्न आवश्यक भएको हो। उनले सांसदहरूलाई बैठक चलिरहेका बेला लबीमा लामो समयसम्म बस्ने वा अनावश्यक गफ गर्ने प्रवृत्तिप्रति पनि असन्तुष्टि जनाएका छन्।
हाल प्रधानमन्त्री Balen Shah, गृहमन्त्री Sudhan Gurung, पूर्वाधार मन्त्री Sunil Lamsal तथा केही सांसदहरू कालो चस्मा लगाएर संसद बैठकमा सहभागी हुँदै आएका छन्।
नेपाली कांग्रेसकी प्रमुख सचेतक Basana Thapaले नियम सबै सांसद, मन्त्री र प्रधानमन्त्रीमा समान रूपमा लागू हुनुपर्ने धारणा राखिन्। उनले प्रधानमन्त्री र मन्त्रीहरू पनि कालो चस्मा लगाएर संसदमा आउने गरेको उल्लेख गर्दै सभामुखले सरकारलाई समेत यसबारे जानकारी गराउनुपर्ने बताइन्।
रास्वपाका सचेतक Prakash Chandra Pariyarले संसद बैठकलाई मर्यादित बनाउने सन्दर्भमा कालो चस्मासँगै सांसदहरूले लोगो लगाउने र मर्यादित पोशाक अपनाउने विषयमा पनि छलफल भएको जानकारी दिए।
नेकपाका प्रमुख सचेतक Yubaraj Dulalका अनुसार सभामुखले संसदको गरिमा र विश्वव्यापी संसदीय अभ्यासलाई ध्यानमा राख्दै औपचारिक पोशाक तथा मर्यादित उपस्थितिमा जोड दिएका हुन्।
प्रतिनिधि सभा नियमावलीमा सांसदहरूको पोशाक कार्यव्यवस्था परामर्श समितिको परामर्शमा सभामुखले तोक्ने व्यवस्था छ। साथै औपचारिक, मौलिक संस्कृति, परम्परा तथा पहिचान झल्किने मर्यादित भेषभूषामा विशेष ध्यान दिनुपर्ने उल्लेख गरिएको छ।
