इरानसँग पाँच महिनाभन्दा लामो समयदेखि जारी युद्धका कारण अमेरिकी हतियार भण्डार तीव्र रूपमा घट्दै गएपछि राष्ट्रपति डोनाल्ड ट्रम्प र रक्षामन्त्री Pete Hegsethबीच तनाव बढेको दाबी गरिएको छ।
अमेरिकी अखबार द वासिङ्टन पोस्टका अनुसार क्याम्प डेभिडमा मन्त्रिपरिषद् बैठकपछि ट्रम्पले हेगसेथसँग छुट्टै छलफल गर्दै हतियार भण्डार किन कमजोर अवस्थामा पुगेको भन्ने विषयमा स्पष्टीकरण मागेका थिए। बैठकबारे जानकार स्रोतहरूका अनुसार ट्रम्पले हतियार अभावको समस्या पहिले नै समाधान भइसकेको ठाने पनि वास्तविक अवस्था फरक देखिएपछि असन्तुष्टि व्यक्त गरेका थिए।
समाचारअनुसार हेगसेथले आफ्नो बचाउ गर्दै हतियार अभावबारे पर्याप्त जानकारी राष्ट्रपतिसम्म नपुगेको आरोप उपरक्षामन्त्री Stephen Feinbergमाथि लगाएका थिए। यद्यपि ह्वाइट हाउस र पेन्टागनले भने यस्तो दाबी अस्वीकार गर्दै ट्रम्पको हेगसेथमाथि पूर्ण विश्वास रहेको बताएका छन्।
इरानमाथि सैन्य कारबाहीको पक्षमा रहेका हेगसेथले युद्ध छिट्टै सकिने र अमेरिका अनुकूल परिणाम आउने विश्वास दिलाएका थिए। तर पाँच महिना बितिसक्दा पनि युद्ध निर्णायक मोडमा पुग्न नसकेको तथा अमेरिकी लामो दूरीका मिसाइल र हवाई प्रतिरक्षा प्रणालीको मौज्दात तीव्र रूपमा घटेको बताइएको छ।
रिपोर्टअनुसार युद्धको पहिलो महिनामै अमेरिकाले ८५० भन्दा बढी टमाहक क्रुज मिसाइल, एक हजारभन्दा बढी प्याट्रियट र थाड प्रतिरक्षा मिसाइल तथा १,३०० भन्दा बढी एट्याकम्स रणनीतिक मिसाइल प्रयोग गरेको थियो। युक्रेनलाई उपलब्ध गराइने एट्याकम्स मिसाइलको मौज्दात पनि अत्यन्त न्यून स्तरमा पुगेको बताइएको छ।
हतियार अभावकै कारण ट्रम्पले इरानमाथि थप ठूलो सैन्य आक्रमणको योजना पछिल्ला दिनहरूमा स्थगित गरेको पनि वासिङ्टन पोस्टले जनाएको छ। यद्यपि ह्वाइट हाउस र पेन्टागनले हतियार सकिएको, आन्तरिक विवाद भएको वा रक्षामन्त्रीले गलत जानकारी दिएको भन्ने सबै दाबीलाई “काल्पनिक” भन्दै खण्डन गरेका छन्।
रिपोर्टका अनुसार अमेरिकाले नयाँ मिसाइल उत्पादनका लागि सम्झौता गरे पनि उत्पादन प्रक्रिया पूरा हुन दुई वर्षसम्म लाग्न सक्ने भएकाले तत्काल हतियार अभाव समाधान हुने सम्भावना कम छ। यसैबीच हेगसेथ, उपरक्षामन्त्री फाइनबर्ग र संयुक्त चिफ अफ स्टाफका अध्यक्ष Dan Caineले हतियार भण्डार पुनः भर्न थप ६७ अर्ब अमेरिकी डलर बजेट माग गरेका छन्। तर उक्त प्रस्तावमा अमेरिकी सिनेटमा अझै सहमति जुट्न सकेको छैन।
