अहिले सोसल मिडियामा एउटा यस्तो अनौठो ट्रेन्ड सुरु भएको छ, जसले सबैलाई चकित बनाएको छ। आर्टिफिसियल इन्टेलिजेन्स (AI) को प्रयोग गरेर बनाइएका फलफूलहरू प्रेममा परेको भिडियोले टिकटकमा संसारभर तहल्का पिटेको हो। “फ्रुट लभ आइल्याण्ड” नामको यो एकाउन्टले मात्र ९ दिनमा ३१ लाखभन्दा बढी फलोअर्स कमाएर नयाँ कीर्तिमान राखेको छ।
यी भिडियोहरूमा केरा, स्याउ र सुन्तलाहरू मान्छे जस्तै जिस्कने, झगडा गर्ने र प्रेममा परेको देखाइन्छ। प्रविधिको प्रयोगबाट फलफूलमा मानवीय भावना र संवाद भरिएका कारण यसले दर्शकलाई बाँधेर राखेको छ।
‘बेनानिर्नो’ को क्रेज र इन्टरनेट सेन्सेसन
भिडियोमा देखाइने विभिन्न पात्रहरूमध्ये “बेनानिर्नो” नामको एउटा केराको क्यारेक्टर अहिले इन्टरनेट सेन्सेसन बनेको छ। उक्त केराले गर्ने अभिनय र त्यसको प्रेम सम्बन्धलाई लिएर टिकटक प्रयोगकर्ताहरू निकै उत्साहित देखिन्छन्। धेरैले यसलाई “वाहियात तर हेर्न नछोडिने” सामग्रीका रूपमा व्याख्या गरेका छन्।
यो ट्रेन्डले एआईको रचनात्मक प्रयोग कसरी मानिसको मनोविज्ञानसँग जोडिन सक्छ भन्ने एउटा गतिलो उदाहरण पेश गरेको छ। अचम्मको कुरा त के छ भने, वास्तविक मान्छेहरूले वर्षौँसम्म दुःख गर्दा नपाएको चर्चा यी एआई निर्मित फलफूलले केही दिनमै पाएका छन्। अहिले हजारौँ मानिसहरू अर्को भागमा कुन फलको ‘ब्रेकअप’ वा ‘प्याचअप’ हुन्छ भनेर कौतूहलका साथ पर्खिरहेका भेटिन्छन्।
