काठमाडौँ । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानेन्द्र शाहीले सरकारका गलत कदमको विरोध जारी राख्ने बताएका छन्। उनले सरकारका सही काममा समर्थन गर्ने र गलत काममा खबरदारी गर्ने प्रतिपक्षको भूमिका निर्वाह गर्ने बताए।
शुक्रबार प्रतिनिधिसभाको बैठकमा बोल्दै शाहीले प्रतिपक्षी दल सरकारको विरोधी नभएको उल्लेख गर्दै भ्रष्टाचारविरुद्धको कारबाहीमा सरकारलाई साथ दिन तयार रहेको बताए। उनले सत्तापक्षका सांसदहरूले सरकारका कमजोरी ढाकछोप गर्नुभन्दा सुधारका लागि सुझाव दिनुपर्ने धारणा राखे।
शाहीले सरकारको छमहिने कार्यकालमा भएका कामबारे प्रश्न उठाउँदै जेनजी आन्दोलनका क्रममा भएका हत्या, हिंसा तथा सिंहदरबार र संसद् भवनलगायतका संरचनामा भएको तोडफोडका घटनामा संलग्नलाई कारबाही गर्न सरकारले पर्याप्त पहल नगरेको आरोप लगाए।
उनले एनसेल, गिरीबन्धु टी–स्टेट, नक्कली भुटानी शरणार्थी प्रकरण र चिनियाँ विमान खरिदसम्बन्धी विवादको छानबिन कहाँ पुगेको छ भन्दै सरकारसँग जवाफ मागे। मानव अधिकार आयोगले प्रमाण बुझाएको भनिएका घटनामा समेत अनुसन्धान अघि नबढेको उनको दाबी थियो।
कानुनको प्रयोग प्रतिशोध साँध्न नभई न्याय स्थापित गर्न हुनुपर्नेमा जोड दिँदै शाहीले सरकारलाई निष्पक्ष रूपमा काम गर्न आग्रह गरे।
उनले युवाहरू रोजगारीका लागि विदेशिनुपर्ने बाध्यता अन्त्य गर्न सरकारको ध्यानाकर्षण गराउँदै ‘एक पटकको नेपाली, सधैँको नेपाली’ भन्ने अवधारणासहित संविधान संशोधन प्रक्रिया अघि बढाउन पनि माग गरे।
शाहीका यी अभिव्यक्ति सरकारको कार्यसम्पादन, भ्रष्टाचारका पुराना प्रकरणको अनुसन्धान र जेनजी आन्दोलनका घटनामा जवाफदेहितासम्बन्धी उनका आरोप तथा माग हुन्।
