काठमाडौँ । राष्ट्रिय प्रजातन्त्र पार्टी (राप्रपा)का सांसद ज्ञानेन्द्र शाहीले स्वदेशी उत्पादनलाई प्राथमिकता दिँदै विदेशबाट हुने स्याउको आयात रोक्न सरकारसँग माग गरेका छन्।
सोमबार प्रतिनिधिसभाको बैठकमा बोल्दै सांसद शाहीले नेपालमा पर्याप्त सम्भावना हुँदाहुँदै ठूलो रकम खर्च गरेर विदेशबाट स्याउ आयात भइरहेको भन्दै सरकारको ध्यानाकर्षण गराएका हुन्।
शाहीका अनुसार अघिल्लो आर्थिक वर्षमा मात्रै नेपालले १० अर्ब ५५ करोड ७५ लाख रुपैयाँभन्दा बढीको स्याउ आयात गरेको थियो। यस्तै, अघिल्लो वर्षको साउन महिनामा मात्रै करिब १ अर्ब ५ करोड ४४ लाख रुपैयाँ बराबरको स्याउ आयात भएको उनले बताए।
विदेशबाट ठूलो परिमाणमा स्याउ आयात भइरहँदा नेपाली किसानले उत्पादन गरेको स्याउ भने बजार अभावका कारण बिक्री गर्न समस्या भइरहेको शाहीको भनाइ छ। उनले स्वदेशी किसानको उत्पादनलाई बजार सुनिश्चित गर्दै आयात प्रतिस्थापनको नीति लिन सरकारलाई आग्रह गरे।
सांसद शाहीले विशेषगरी जुम्लाको कृषि सम्भावनालाई राज्यले पर्याप्त रूपमा उपयोग गर्न नसकेको बताए। उनका अनुसार जुम्लामा करिब ३८ हजार ४८६ हेक्टर खेतीयोग्य जमिन रहेको छ। तर त्यसको करिब ११ प्रतिशत क्षेत्रमा मात्रै खेती भइरहेको र ठूलो क्षेत्रको जमिन उपयोगविहीन रहेको उनले उल्लेख गरे।
नेपालमै उत्पादन बढाउन सकिने कृषि उपज विदेशबाट आयात गर्ने प्रवृत्तिलाई निरुत्साहित गर्नुपर्नेमा जोड दिँदै शाहीले किसानलाई उत्पादन, बजार र मूल्यको सुनिश्चितता दिन सरकारसँग माग गरेका छन्।
स्याउ आयात र जुम्लाको कृषि सम्भावना
| विवरण | तथ्यांक |
|---|---|
| अघिल्लो आर्थिक वर्षको स्याउ आयात | १० अर्ब ५५ करोड ७५ लाख रुपैयाँभन्दा बढी |
| अघिल्लो वर्ष साउनमा स्याउ आयात | करिब १ अर्ब ५ करोड ४४ लाख रुपैयाँ |
| जुम्लाको खेतीयोग्य जमिन | करिब ३८ हजार ४८६ हेक्टर |
| खेती भइरहेको क्षेत्र | करिब ११ प्रतिशत |
| बाँकी जमिन | ठूलो हिस्सा उपयोगविहीन |
| सांसदको मुख्य माग | विदेशबाट स्याउ आयात रोक्नुपर्ने |
