काठमाडौं । अमेरिकाले इरानमा गरेको हवाई आक्रमणको जवाफमा इरानले मध्यपूर्वका चार देशमा रहेका अमेरिकी सैन्य अड्डालाई लक्ष्य गरी मिसाइल र ड्रोनमार्फत हमला गरेको छ।
अन्तर्राष्ट्रिय सञ्चारमाध्यमका अनुसार इरानले बहराइन, कुवेत, जोर्डन र कतारमा रहेका अमेरिकी सैन्य संरचनालाई निशाना बनाएको हो। अमेरिका र इरानबीच बुधबारदेखि सैन्य तनाव बढ्दै आएको छ।
यसअघि स्ट्रेट अफ हर्मुजमा तीन वटा जहाजलाई लक्ष्य गरी इरानले हमला गरेको आरोप लगाउँदै अमेरिकाले इरानका सैन्य अड्डा, रडार र प्रतिरक्षा प्रणालीमा हवाई आक्रमण गरेको थियो। त्यसको जवाफमा इरानले अमेरिकी सैन्य आधारहरूलाई निशाना बनाएको जनाएको छ।
अमेरिकी समाचार संस्था एसोसिएटेड प्रेस (एपी)का अनुसार पछिल्लो इरानी हमला ठूलो स्तरको रहेको थियो। बहराइनस्थित अमेरिकी नौसेनाको फिफ्थ फ्लिट मुख्यालयमा कम्तीमा तीन पटक साइरन बजेको थियो भने जोर्डनमा पनि चेतावनी साइरन बजेको थियो।
इरानी सरकारी सञ्चारमाध्यमले इस्लामिक रिभोलुसनरी गार्ड कोर्प्स (आईआरजीसी)ले जोर्डनस्थित अमेरिकी सैन्य अड्डामा मिसाइल प्रहार गरेको दाबी गरेको छ। तर जोर्डन सरकारले सबै मिसाइल र ड्रोन आकाशमै नष्ट गरिएको जनाएको छ।
बहराइनले पनि सबै आक्रमण असफल पारिएको जनाएको छ। कुवेतले तीन वटा ब्यालिस्टिक मिसाइल, एउटा क्रुज मिसाइल र १० वटा ड्रोन खसालेको दाबी गरेको छ। कुवेतमा मिसाइलका अवशेष खस्दा एक जना घाइते भएको सेनाले जनाएको छ।
अमेरिकी सेनाको सेन्ट्रल कमाण्ड (सेन्टकम)ले इरानभर ९० वटा लक्ष्यमा आक्रमण गरिएको जनाएको छ। सेन्टकमले विमानस्थलका धावनमार्ग, मिसाइल प्रक्षेपण स्थललगायत स्थानमा आक्रमण गरिएको भिडियो सार्वजनिक गरेको छ।
अमेरिकाले आफ्नो आक्रमणको उद्देश्य स्ट्रेट अफ हर्मुजमा जहाज आवतजावतमा खतरा पुर्याउने इरानको क्षमता कमजोर बनाउनु रहेको जनाएको छ। विश्वको करिब २० प्रतिशत तेल र प्राकृतिक ग्यास यही जलमार्ग हुँदै ओसारपसार हुने गर्छ।
यसैबीच, इरानी सरकारी सञ्चारमाध्यमले बुशेहरसहित विभिन्न स्थानमा विस्फोट भएको जनाएको छ। बुशेहरमा इरानको एक मात्र आणविक ऊर्जा केन्द्र रहेको छ। स्थानीय अधिकारीहरूले अमेरिकाले आणविक केन्द्र नजिकै आक्रमण गरेको आरोप लगाए पनि सेन्टकमले आफ्नो लक्ष्य सूचीमा बुशेहर आणविक केन्द्र उल्लेख गरेको छैन।
इरानको स्वास्थ्य मन्त्रालयका अनुसार पछिल्ला दुई दिनमा अमेरिकी आक्रमणमा कम्तीमा १४ जनाको मृत्यु भएको छ भने ७८ जना घाइते भएका छन्। अधिकांश मृतक सुरक्षा बलका सदस्य रहेको जनाइएको छ।
ट्रम्पको चेतावनी
अमेरिकी राष्ट्रपति डोनाल्ड ट्रम्पले स्ट्रेट अफ हर्मुजमा भएको जहाज आक्रमणलाई अस्थायी युद्धविराम अन्त्यको संकेत भन्दै इरानलाई कडा चेतावनी दिएका छन्।
ट्रम्पले इरानको विद्युत् पूर्वाधार, समुद्री पानी प्रशोधन केन्द्र र करिब ९० प्रतिशत तेल निर्यात हुने खार्ग टापुलाई समेत भविष्यमा निशाना बनाउन सकिने बताएका छन्।
यसको जवाफमा इरानी संसद्का सभामुख मोहम्मद बाघेर गालिबाफले अमेरिकाले आक्रमण गरे त्यसको जवाफ दिने चेतावनी दिएका छन्।
इरानी विदेशमन्त्री अब्बास अराघचीले साउदी अरेबिया, टर्की, ओमानका विदेशमन्त्री तथा पाकिस्तानका सेना प्रमुख फिल्ड मार्शल आसिम मुनिरसँग टेलिफोन वार्ता गरेका छन्। यसलाई तनाव कम गर्ने कूटनीतिक प्रयासका रूपमा हेरिएको छ।
यसैबीच, इरानका पूर्व सर्वोच्च नेता आयतोल्लाह अली खामेनीको अन्त्येष्टि शुक्रबार उनको जन्मस्थान मशहदस्थित इमाम रेजा दरगाहमा गरिएको छ। एपीका अनुसार अन्त्येष्टिपछि स्थायी शान्ति सम्झौताका लागि वार्ता अघि बढाउने तयारी भइरहेको छ।
