इलाम। स्वास्थ्य परीक्षण जस्तो संवेदनशील क्षेत्रमा कार्यरत प्रयोगशालाको गुणस्तर र जनशक्तिको दक्षतामाथि प्रश्न उठाउने घटना इलाममा सार्वजनिक भएको छ। एउटै बिरामीको छोटो समय अन्तरालमा गरिएको स्वास्थ्य परीक्षणको रिपोर्ट फरक–फरक आएपछि स्थानीय स्वास्थ्य संस्थामा भइरहेको परीक्षण सेवाको विश्वसनीयतामाथि चासो बढेको हो।
इलामका विनोद रिजालले स्वास्थ्य समस्या देखिएपछि गराएका विभिन्न परीक्षणका रिपोर्टमा देखिएको फरकपनले प्रयोगशालामा कार्यरत प्राविधिकको सीप, परीक्षण प्रक्रिया र गुणस्तर नियन्त्रण प्रणालीमाथि प्रश्न उठाएको छ।
प्राप्त विवरणअनुसार रिजालले साउन १७, २०८३ मा इलामस्थित आदर्श फार्मेसी एन्ड पोलिक्लिनिक मा रगत तथा अल्ट्रासाउन्ड परीक्षण गराएका थिए। उक्त परीक्षणमा क्रिएटिनिन (Creatinine) लगायतका स्वास्थ्य सूचकहरूमा असामान्य नतिजा देखिएको थियो भने अन्य विवरणमा पनि फरक देखिएको बताइएको छ।
तर त्यसको भोलिपल्ट अर्थात् साउन १८, २०८३ मा झापास्थित बिर्ता सिटी डायग्नोस्टिक्स मा पुनः परीक्षण गराउँदा रिपोर्ट फरक आएको र बिरामीको वास्तविक समस्या एक्युट एपेन्डिसाइटिस (Acute Appendicitis) रहेको पुष्टि भएको जनाइएको छ।
स्वास्थ्य क्षेत्रका जानकारहरूका अनुसार एउटै बिरामीको छोटो अवधिमा गरिएको परीक्षणमा ठूलो भिन्नता देखिनु प्रयोगशालाको परीक्षण प्रक्रिया, प्राविधिक दक्षता तथा गुणस्तर नियन्त्रण प्रणालीमा कमजोरीको संकेत हुन सक्छ।
गलत रिपोर्टका कारण बिरामीले गलत औषधि सेवन गर्नुपर्ने, रोग पहिचानमा ढिलाइ हुने वा उपचार प्रक्रिया प्रभावित हुने जोखिम रहने भएकाले स्वास्थ्य संस्थाको अनुगमन र नियमन प्रभावकारी बनाउनुपर्ने माग उठेको छ।
स्थानीयवासीले स्वास्थ्य परीक्षण गर्ने संस्थामा कार्यरत जनशक्तिको योग्यता, प्रमाणपत्र, प्राविधिक क्षमता तथा प्रयोगशालाको मापदण्डबारे सम्बन्धित निकायले तत्काल छानबिन गर्नुपर्ने माग गरेका छन्।
स्वास्थ्य परीक्षण सेवाको विश्वसनीयता कायम राख्न नियमित अनुगमन, दक्ष जनशक्तिको सुनिश्चितता र प्रयोगशालाको गुणस्तर परीक्षण आवश्यक रहेको सरोकारवालाहरूको भनाइ छ।
