काठमाडौँ । लोकप्रिय नेपाली ब्यान्ड नेपथ्य ले यस वर्षको क्यानडा सांगीतिक शृंखला हिउँले ढाकिएको सहर सदबरी बाट सुरु गरेको छ। शुक्रबार यहाँस्थित सदबरी कम्युनिटी एरेना मा पहिलो प्रस्तुति दिँदै ब्यान्डले नेपाली लोकरक संगीत प्रस्तुत गरेको हो।
ओन्तारियो को प्रमुख व्यापारिक केन्द्र टोरोन्टो बाट करिब ४०० किलोमिटर टाढा रहेको यस सहरमा पछिल्ला वर्षहरूमा नेपाली समुदाय उल्लेख्य रूपमा बढ्दै करिब दुई हजारको हाराहारीमा पुगेको छ।
कन्सर्टमा टाढाटाढाबाट आएका दर्शकहरूको उत्साहजनक उपस्थिति देखिएको थियो। सन्ध्या खनाल जस्ता दर्शक १४ घण्टा टाढा थन्डर बे बाट यात्रा गरी कार्यक्रममा सहभागी भएका थिए। उनले कन्सर्टले आफूलाई नेपालमै पुगेजस्तो अनुभूति गराएको बताइन्।
कार्यक्रममा ब्यान्डका गायक अमृत गुरुङ ले लोकप्रिय गीतसँगै राष्ट्रिय भावना बोकेका प्रस्तुति दिएका थिए। उनले नेपाल भ्रमण र पदयात्राको महत्त्वबारे दर्शकलाई प्रेरित समेत गरेका थिए।
कन्सर्टले विदेशी दर्शकलाई पनि आकर्षित गरेको देखियो। फ्रान्सेली मूलका जाभिए गोत्सिए बुसे ले भाषा नबुझे पनि संगीतमार्फत नेपाली भावना महसुस गर्न सकेको बताए।
कार्यक्रममा अधिकांश सहभागी क्यानडामा अध्ययनरत नेपाली विद्यार्थी थिए। उनीहरूलाई सम्बोधन गर्दै अमृत गुरुङले नेपालमा अझै शिक्षा पहुँचबाट वञ्चित बालबालिकाको अवस्था स्मरण गराउँदै सहयोग गर्न आग्रह गरे।
यसैबीच, प्रयाना राई ले कन्सर्टलाई सांगीतिक मात्र नभई नेपाली पहिचान जगाउने अवसरका रूपमा लिएको बताइन्। स्थानीय सामाजिक अभियन्ता रोजी बउलिउ ले भने नेपाली समुदायप्रति आफ्नो धारणा अझ सकारात्मक बनेको प्रतिक्रिया दिइन्।
अवकाशप्राप्त बेलायती सेना तेन्जिङ लिम्बु का अनुसार विगतमा न्यून रहेको नेपाली उपस्थिति अहिले सुदृढ समुदायमा परिणत हुँदै गएको छ। उनले उक्त कन्सर्टलाई सदबरीमा आयोजना भएका नेपाली कार्यक्रममध्ये सबैभन्दा भव्य र व्यवस्थित कार्यक्रमका रूपमा वर्णन गरे।
यस कार्यक्रमले क्यानडामा नेपाली सांस्कृतिक पहिचानलाई अझ सशक्त बनाउँदै अन्तर्राष्ट्रिय समुदायमा नयाँ छाप छोड्न सफल भएको देखिएको छ।
