काठमाडौं — विश्वकै चर्चित चिप निर्माता कम्पनी एनभिडिया (NVIDIA) का प्रमुख कार्यकारी अधिकृत जेन्सेन ह्वाङले कम्पनीको त्रैमासिक राजस्व १०० अर्ब अमेरिकी डलर नजिक पुग्न सक्ने संकेत दिएका छन्।
ह्वाङले यसै साता मोर्गन स्ट्यान्लीको लगानीकर्ता रोडशो कार्यक्रममा व्यक्तिगत रूपमा सहभागी हुँदै कम्पनीको तीव्र वृद्धिबारे जानकारी दिएका हुन्। उनले एनभिडियाको एआई चिप व्यवसायमा बलियो माग कायम रहेको र कम्पनीको आगामी उत्पादन योजना (रोडम्याप) यथावत रहेको बताएका छन्।
एनभिडियाले आर्थिक वर्ष २०२७ को पहिलो त्रैमासिकमा ८१.६ अर्ब डलर राजस्व रिपोर्ट गरेको थियो। यो अघिल्लो त्रैमासिकको तुलनामा २० प्रतिशत र वार्षिक आधारमा ८५ प्रतिशत वृद्धि हो।
कम्पनीले जुलाईमा समाप्त हुने दोस्रो त्रैमासिकका लागि करिब ९१ अर्ब डलर राजस्वको अनुमान सार्वजनिक गरेको छ। हालको वृद्धिदर कायम रहेमा एक त्रैमासिकमै १०० अर्ब डलर राजस्व हासिल गर्न सकिने अपेक्षा गरिएको छ।
मोर्गन स्ट्यान्लीका विश्लेषक जोसेफ मुरले एनभिडियालाई ‘ओभरवेट’ रेटिङ दिँदै कम्पनीको सेयर मूल्य लक्ष्य २८८ डलर कायम गरेका छन्। यो हालको मूल्यभन्दा करिब ४३ प्रतिशत माथि पुग्न सक्ने अनुमान हो।
मुरले सन् २०२७ को अनुमानित आम्दानी (EPS) लाई आधार बनाएर उक्त मूल्य लक्ष्य निर्धारण गरेका हुन्। मोर्गन स्ट्यान्लीका अनुसार एआई एक्सेलेरेटर बजारमा एनभिडियाको हिस्सा करिब ८५ प्रतिशत रहेको छ।
यसअघि सेमीएनालिसिसले एनभिडियाको नयाँ रुबिन अल्ट्रा प्लेटफर्ममा ढिलाइ र डिजाइन परिवर्तन भएको रिपोर्ट सार्वजनिक गरेको थियो। तर एनभिडियाले उक्त दाबी अस्वीकार गर्दै आफ्नो उत्पादन रोडम्यापमा कुनै परिवर्तन नभएको जनाएको छ।
एनभिडियाले पछिल्लो आर्थिक वर्षमा २१५.९ अर्ब डलर आम्दानी र करिब १२० अर्ब डलर नाफा रिपोर्ट गरेको थियो। कृत्रिम बुद्धिमत्ता (एआई) प्रविधिको बढ्दो प्रयोगसँगै कम्पनीको चिपको माग तीव्र रूपमा बढिरहेको छ।
