काठमाडौं । नेकपाका संयोजक पुष्पकमल दाहाल ‘प्रचण्ड’ले वामपन्थी शक्तिहरूलाई साझा न्यूनतम कार्यक्रम बनाएर संयुक्त आन्दोलनमा उत्रिन आह्वान गरेका छन्। उनले प्रतिक्रान्तिको प्रक्रिया अझै समाप्त नभएको दाबी गर्दै त्यसलाई परास्त गर्न संगठित रूपमा अघि बढ्नुपर्ने बताएका छन्।
शुक्रबार काठमाडौंमा पुष्पलाल स्मृति दिवसको अवसरमा आयोजित ‘वर्तमान राजनीतिक परिस्थितिमा वामपन्थी दलहरूको भूमिका’ विषयक विचार गोष्ठीमा बोल्दै प्रचण्डले संसद, निर्वाचन र जनआन्दोलन सबै मोर्चाबाट संघर्ष गर्नुपर्ने धारणा राखे।
उनले वर्तमान सत्ता परिवर्तनका घटनाले एकै दिनमा राजनीतिक समीकरण बदल्न सकिने उदाहरण देखाइसकेको उल्लेख गर्दै वामपन्थी शक्तिले पनि त्यसअनुसार रणनीति बनाउनुपर्ने बताए।
साझा आन्दोलनको प्रस्ताव
प्रचण्डले सबै वामपन्थी दलले साझा न्यूनतम कार्यक्रम तयार गरी आफ्नो क्षमताअनुसार काठमाडौं र जिल्ला सदरमुकाममा कार्यकर्ता परिचालन गर्नुपर्ने प्रस्ताव गरे।
उनका अनुसार व्यापक जनपरिचालनमार्फत शक्तिशाली आन्दोलन निर्माण गर्न सके राजनीतिक परिवर्तन सम्भव हुने दाबी गरे।
‘प्रतिक्रान्ति अझै समाप्त भएको छैन’
प्रचण्डले प्रतिक्रान्तिको प्रक्रिया अझै जारी रहेको दाबी गर्दै त्यसलाई रोक्न वामपन्थी शक्तिबीच तत्काल सहकार्य आवश्यक रहेको बताए।
उनले समयमै एकताबद्ध हुन नसके वाम आन्दोलन कमजोर बन्ने चेतावनी पनि दिए।
पार्टी एकता होइन, तत्काल कार्यगत एकता
प्रचण्डले अहिले नै सबै वाम दल एउटै पार्टीमा विलय हुने सम्भावना नरहेको स्पष्ट पारे। पार्टी एकताको बहसभन्दा तत्काल सहकार्य र कार्यगत एकतामा जोड दिनुपर्ने उनको भनाइ थियो।
उनले इमानदार सहकार्य सफल भए भविष्यमा पार्टी एकताको आधार पनि त्यहीँबाट बन्न सक्ने बताए।
सरकार परिवर्तनको खेलप्रति चेतावनी
प्रचण्डले सरकार बनाउने–गिराउने अस्थिर राजनीतिक खेलमा फेरि फसिए अर्को प्रतिक्रान्तिको जोखिम बढ्ने दाबी गरे। त्यसैले वाम शक्तिले ठूला भाषणभन्दा व्यवहारिक कार्ययोजनासहित आन्दोलनमा केन्द्रित हुनुपर्नेमा उनले जोड दिए।
