विराटनगर । सुनसरीको देवानगन्ज गाउँपालिका–कप्तानगन्जमा उत्पन्न तनावको प्रभाव कोशी प्रदेशको राजधानी विराटनगरसम्म पुगेको छ। त्रासका कारण मंगलबार बिहानैदेखि विराटनगरका मुख्य बजार क्षेत्र, निजी विद्यालय तथा केही शैक्षिक संस्था बन्द भएका छन् भने पूर्व–पश्चिम राजमार्गका विभिन्न स्थानमा प्रदर्शन जारी रहँदा यातायात पूर्ण रूपमा प्रभावित बनेको छ।
प्रदर्शनकारीहरूले पकलीदेखि कोशी ब्यारेजसम्मका विभिन्न स्थानमा टायर बालेर सडक अवरुद्ध गरेका छन्। जसका कारण सयौँ यात्रुहरू बाटोमै अलपत्र परेका छन् भने लामो दूरीका सवारीसाधन सञ्चालन हुन सकेका छैनन्।
जिल्ला प्रहरी कार्यालय सुनसरीका प्रवक्ता डीएसपी चन्द्र खड्काका अनुसार देवानगन्ज–कप्तानगन्ज क्षेत्रको अवस्था बिस्तारै सामान्य बन्दै गएको भए पनि राजमार्ग क्षेत्रमा प्रदर्शन जारी रहेकाले ठूलो संख्यामा सुरक्षाकर्मी परिचालन गरिएको छ।
स्थिति पूर्ण रूपमा सामान्य नभएसम्म अनावश्यक यात्रा नगर्न प्रहरीले सर्वसाधारणलाई आग्रह गरेको छ।
उता, आइतबार राति र सोमबार दिउँसो भएका घटनाप्रति दुःख व्यक्त गर्दै सुनसरीका तीन स्थानीय तहले सामाजिक सद्भाव र संयमता कायम राख्न सबैसँग अपिल गरेका छन्।
हरिनगर गाउँपालिका र भोक्राहा नरसिंह गाउँपालिकाले घटनाको शोकमा मंगलबार स्थानीय सार्वजनिक बिदा दिएका छन्। हरिनगर गाउँपालिकाका अध्यक्ष गफार अन्सारीद्वारा जारी विज्ञप्तिअनुसार गाउँपालिका कार्यालय, वडा कार्यालय, शैक्षिक संस्था तथा अत्यावश्यकबाहेकका स्वास्थ्य संस्थाहरू बन्द रहेका छन्।
देवानगन्ज घटनामा एक जनाको मृत्यु भएको छ भने सुरक्षाकर्मीसहित २२ जना घाइते भएका छन्। घटनाको थप अनुसन्धान जारी रहेको प्रहरीले जनाएको छ।
मुख्य बुँदाहरू
- देवानगन्जको तनावको असर विराटनगरसम्म पुगेको।
- विराटनगरका बजार र अधिकांश निजी विद्यालय बन्द।
- पकलीदेखि कोशी ब्यारेजसम्म राजमार्ग अवरुद्ध, यातायात ठप्प।
- टायर बालेर प्रदर्शन, सयौँ यात्रु बाटोमै अलपत्र।
- राजमार्ग क्षेत्रमा ठूलो संख्यामा सुरक्षाकर्मी परिचालन।
- प्रहरीको आग्रह– स्थिति सामान्य नभएसम्म अनावश्यक यात्रा नगर्न।
- हरिनगर र भोक्राहा नरसिंह गाउँपालिकामा स्थानीय सार्वजनिक बिदा।
- घटनामा एक जनाको मृत्यु, सुरक्षाकर्मीसहित २२ जना घाइते।
- स्थानीय तहहरूको सामाजिक सद्भाव कायम राख्न संयुक्त अपिल।
