काठमाडौं, असार १५ — विश्वकप फुटबलको इतिहासमै पहिलो पटक ४८ टोली सहभागी भएको संस्करणमा समूह चरण सम्पन्न भएसँगै नकआउट चरण (राउन्ड अफ ३२) को समीकरण पूरा भएको छ।
यस संस्करणमा नयाँ प्रतियोगिता ढाँचाअनुसार १२ समूहका शीर्ष दुई टोलीसँगै तेस्रो स्थान हासिल गर्ने उत्कृष्ट आठ टोलीले पनि नकआउट चरणमा स्थान बनाएका छन्। यसअघि ३२ टोली सहभागी हुने विश्वकपमा प्रत्येक समूहका शीर्ष दुई टोली मात्र अघिल्लो चरणमा पुग्ने व्यवस्था थियो।
समूह चरणका अन्तिम खेल शनिबार राति सम्पन्न भएसँगै उत्कृष्ट तेस्रो स्थानमा रहँदै अघिल्लो चरण पुग्ने टोलीहरूको टुङ्गो लागेको हो।
नकआउट चरणमा स्थान बनाउने तेस्रो स्थानका टोलीहरूमा डीआर कंगो, स्वीडेन, घाना, इक्वेडर, बोस्निया र हर्जगोभिना, पाराग्वे, सेनेगल र अल्जेरिया रहेका छन्। यी टोलीहरूले अब राउन्ड अफ ३२ मा क्रमशः इङ्गल्याण्ड, फ्रान्स, कोलम्बिया, मेक्सिको, संयुक्त राज्य अमेरिका, जर्मनी, बेल्जियम र स्विट्जरल्यान्डसँग प्रतिस्पर्धा गर्नेछन्।
यता, इरान, दक्षिण कोरिया, स्कटल्यान्ड र उरुग्वे भने तेस्रो स्थानमा रहे पनि अघिल्लो चरणमा पुग्न असफल भए। इरान अन्तिम समयमा गरिएको गोल भिडियो सहायक रेफ्री (VAR) बाट अफसाइड ठहरिएपछि बाहिरिएको हो। दक्षिण कोरियाले तीन अंक मात्र जोड्न सक्यो भने स्कटल्यान्ड कमजोर गोलअन्तरका कारण बाहिरियो। दुई पटकको विश्व विजेता उरुग्वेले भने समूह चरणमा कुनै पनि खेल जित्न नसकी दुई अंकमै सीमित रहँदै प्रतियोगिताबाट बाहिरिएको छ।
नयाँ ढाँचाले समूह चरणको अन्तिम खेलसम्म धेरै टोलीलाई नकआउट चरणमा पुग्ने आशा कायम राखे पनि अन्ततः उत्कृष्ट प्रदर्शन गर्ने टोलीहरूले मात्र अन्तिम ३२ मा स्थान सुरक्षित गरेका छन्। अब प्रतियोगिता नकआउट चरणमा प्रवेश गर्नेछ, जहाँ प्रत्येक खेल हार्ने टोलीको यात्रा समाप्त हुनेछ।
