काठमाडौं, असार १५ — फ्रान्सको उत्तरपूर्वी सहर टोम्ब्लेनमा प्यारासुट प्रशिक्षणका लागि प्रयोग हुने एउटा सानो विमान दुर्घटनाग्रस्त हुँदा त्यसमा सवार सबै ११ जनाको मृत्यु भएको छ।
स्थानीय अधिकारीहरूका अनुसार विमान नान्सी–एसे विमानस्थलबाट उडेको केहीबेरमै दुर्घटनामा परेको थियो। विमानमा एक पाइलट, पाँच प्रशिक्षार्थी प्यारासुटिस्ट र पाँच प्रशिक्षक सवार थिए।
फ्रान्सका गृहमन्त्री लरेन नुनेजले विमान धावनमार्गबाट करिब ३०० मिटर पर खसेको जानकारी दिएका छन्। दुर्घटनाका बेला केही प्रशिक्षार्थीका परिवारका सदस्य विमानस्थलमै उपस्थित रहेको र उनीहरूले दुर्घटना प्रत्यक्ष देखेको पनि उनले बताए।
प्रत्यक्षदर्शीका अनुसार स्थानीय समयअनुसार बिहान करिब ११ बजे विमान उडान भरेपछि अचानक इन्जिनको आवाज बन्द भएको थियो। त्यसपछि विमान ठाडै जमिनतर्फ खसेको उनीहरूको भनाइ छ। दुर्घटनाअघि आगलागी वा विस्फोटजस्ता कुनै असामान्य घटना नदेखिएको बताइएको छ।
क्षेत्रीय प्रिफेक्ट इभ सेगुईका अनुसार दुर्घटनाग्रस्त विमान आवासीय क्षेत्र र किनमेल केन्द्र नजिकै खसेको थियो। विमानको भग्नावशेष साइकल लेनमा छरिएको थियो। उनका अनुसार विमान केही मिटर मात्र फरक स्थानमा खसेको भए आसपासका घर तथा सर्वसाधारणमा पनि ठूलो मानवीय क्षति हुन सक्थ्यो।
स्थानीय सञ्चारमाध्यमका अनुसार दुर्घटनाग्रस्त एक इन्जिन भएको विमान जर्मनीमा दर्ता गरिएको थियो। दुर्घटनाको वास्तविक कारण भने हालसम्म खुलेको छैन। सम्बन्धित निकायले घटनाबारे अनुसन्धान सुरु गरेको जनाएको छ।
