काराकास — भेनेजुएलामा गएको दुई शक्तिशाली भूकम्पपछि मृत्यु हुनेको संख्या १,९४३ पुगेको छ भने १०,००० भन्दा बढी घाइते भएका छन्। विश्व स्वास्थ्य संगठन (WHO) ले देशको स्वास्थ्य प्रणाली गम्भीर दबाबमा परेको चेतावनी दिएको छ।
पछिल्लो तथ्यांकअनुसार घाइतेको संख्या एक दिनअघि ५,०३४ रहेकोमा झण्डै दोब्बर बढेर १०,००० नाघेको छ। भग्नावशेषमुनि थप पीडित फेला परिनु तथा अस्पतालहरूमा लगातार बढ्दो बिरामीको चापका कारण संख्या तीव्र रूपमा बढेको बताइएको छ।
गत जुन २४ को साँझ उत्तर तटीय भेनेजुएलामा ७.२ र ७.५ म्याग्निच्युडका दुई शक्तिशाली भूकम्प ३९ सेकेन्डको अन्तरमा आएका थिए। ती भूकम्पले राजधानी काराकास तथा तटीय सहर ला ग्वायरासहितका क्षेत्रमा व्यापक क्षति पुर्याएका छन्। अमेरिकी भूगर्भीय सर्वेक्षण (USGS) का अनुसार तीमध्ये बलियो भूकम्प भेनेजुएलामा एक शताब्दीभन्दा बढी समययताकै सबैभन्दा शक्तिशाली मानिएको छ।
विश्व स्वास्थ्य संगठनका अनुसार धेरै अस्पतालहरू भूकम्पबाट क्षतिग्रस्त भएका छन् भने सञ्चालनमा रहेका अस्पतालहरूमा पनि जनशक्ति अभाव र अत्यधिक चाप देखिएको छ। सेवा प्रवाह अव्यवस्थित, भीडभाडपूर्ण र शल्यक्रिया सेवामा ठूलो ब्याकलग रहेको WHO ले जनाएको छ।
भूकम्पअघि नै विद्युत् आपूर्ति, शुद्ध खानेपानी र औषधिको अभाव झेलिरहेको स्वास्थ्य प्रणालीले अहिलेको प्रकोपपछि थप गम्भीर संकट सामना गरिरहेको अन्तर्राष्ट्रिय सञ्चारमाध्यमहरूले जनाएका छन्।
उद्धार कार्य भने निरन्तर जारी छ। ७२ घण्टाको ‘गोल्डेन आवर’ पार भइसके पनि उद्धारकर्मीहरूले भग्नावशेषबाट बाँचेकाहरूलाई निकालिरहेका छन्। सरकारी अधिकारीका अनुसार एक व्यक्ति १०६ घण्टासम्म भग्नावशेषमा फसेर पनि जीवित उद्धार गरिएको भिडियो सार्वजनिक गरिएको छ।
प्रभावित क्षेत्रमा करिब ३०,००० स्थानीय उद्धारकर्मी र २,७०० विदेशी उद्धारकर्मी २७ देशबाट परिचालित छन्। अन्तर्राष्ट्रिय आप्रवासन संगठन (IOM) ले ६ लाखभन्दा बढी मानिस प्रभावित हुन सक्ने अनुमान गरेको छ भने अझै हजारौँ व्यक्ति बेपत्ता रहेको बताइएको छ।
एक अमेरिकी अधिकारीका अनुसार तीन अमेरिकी नागरिकको मृत्यु पुष्टि भइसकेको छ भने १२ जना अझै बेपत्ता छन्।
