काठमाडौं । कप्तान केलियन एमबाप्पेले फिफा विश्वकप २०२६ मा आफ्नो आठौँ गोल गर्दै फ्रान्सलाई सेमिफाइनलमा पुर्याएका छन्।
अन्तिम आठको खेलमा सुरुवातमै पेनाल्टी गुमाए पनि एमबाप्पेले उत्कृष्ट गोल गर्दै त्यसको भरपाई गरे। साविक उपविजेता फ्रान्सले मोरक्कोलाई २–० ले पराजित गर्दै प्रतियोगितामा आफ्नो प्रभावशाली यात्रा जारी राखेको छ।
पहिलो हाफमा म्यानचेस्टर युनाइटेडका डिफेन्डर नउसेर मजराउईले एमबाप्पेलाई फाउल गरेपछि फ्रान्सले पेनाल्टी पाएको थियो। तर एमबाप्पेको कमजोर प्रहारलाई मोरक्कोका गोलकिपर यासिन बोनोले सहजै बचाए।
तर ६०औँ मिनेटमा एमबाप्पेले गल्ती सच्याए। उनले पेनाल्टी क्षेत्रभित्रबाट उत्कृष्ट कर्लिङ प्रहार गर्दै फ्रान्सलाई १–० को अग्रता दिलाए। त्यसको छ मिनेटपछि उस्मान डेम्बेलेले मोरक्कोको रक्षापंक्ति चिर्दै दोस्रो गोल गरे।
यो गोलसँगै एमबाप्पेले प्रतियोगितामा अर्जेन्टिनाका लियोनेल मेसीको आठ गोलको बराबरी गरेका छन्। बढी असिस्ट गरेका कारण गोल्डेन बुटको दौडमा भने एमबाप्पे अगाडि छन्।
विश्वकप इतिहासमा सर्वाधिक गोलकर्ताको कीर्तिमानका लागि पनि मेसी र एमबाप्पेबीच प्रतिस्पर्धा देखिएको छ। ३९ वर्षीय मेसीको नाममा २१ गोल छ भने २७ वर्षीय एमबाप्पे २० गोलमा पुगेका छन्।
विश्व वरीयताको सातौँ स्थानमा रहेको मोरक्को खेलभर दबाबमा देखिएको थियो। फ्रान्सले अधिकांश समय नियन्त्रणमा राखेको खेलमा मोरक्कोले ८३औँ मिनेटमा मात्रै पहिलो पटक पोस्टतर्फ प्रहार गर्न सकेको थियो।
फ्रान्सका लागि एमबाप्पे, डेम्बेले र एड्रियन राबियोले गोलका अवसर सिर्जना गरेका थिए। खेलको ७७औँ मिनेटमा एमबाप्पेलाई मैदानबाट बाहिर निकाल्दा उनको दाहिने कुर्कुच्चामा बरफ लगाइएको देखिएको थियो। तर खेलपछि उनी खुसीयाली मनाउँदै उफ्रिरहेको देखिएकाले चोट गम्भीर नरहेको अनुमान गरिएको छ।
अब दुई पटकको विश्व विजेता फ्रान्सले सेमिफाइनलमा मंगलबार डलासमा स्पेन वा बेल्जियमसँग प्रतिस्पर्धा गर्नेछ। फ्रान्स यस विश्वकपको उपाधिका लागि बलियो दाबेदारका रूपमा देखिएको छ।
