पछिल्लो समय बजारमा दुरुस्तै देखिने नक्कली आईफोनहरूको बिगबिगी बढेपछि उपभोक्ताहरू ठगिने जोखिम उच्च भएको छ। बाहिरबाट हेर्दा दुरुस्तै सक्कली जस्तै देखिने भए तापनि फोनको भित्री सेटिङ्सहरू राम्ररी चेक नगर्दा उपभोक्ताको लाखौँ रुपैयाँ डुब्ने खतरा बढेको हो। विशेषगरी सस्तो मूल्यको लोभमा ‘चोर बजार’ वा अनधिकृत पसलहरूबाट फोन किन्दा झुक्किएर नक्कली वा मर्मत गरिएको फोन पर्न सक्ने भन्दै विज्ञहरूले सावधानी अपनाउन आग्रह गरेका छन्।
मोडेल नम्बर र सिरियल नम्बरबाटै खुल्छ वास्तविकता
आफूले किन्न लागेको आईफोन असली हो कि होइन भनेर थाहा पाउन सबैभन्दा पहिले फोनको ‘Settings’ मा गएर ‘General’ भित्रको ‘About’ सेक्सनमा जानुपर्छ। त्यहाँ रहेको सिरियल नम्बरलाई कपी गरेर एप्पलको आधिकारिक ‘Check Coverage’ वेबसाइटमा पेस्ट गर्दा फोनको वारेन्टी र आधिकारिकताको जानकारी तुरुन्तै प्राप्त हुन्छ। यदि वेबसाइटले फोनको विवरण देखाएन भने त्यो फोन नक्कली हो भन्ने प्रस्ट हुन्छ।
यसका साथै, आईफोनको मोडेल नम्बरको पहिलो अक्षरले फोनको अवस्थाबारे महत्वपूर्ण जानकारी दिन्छ। यदि मोडेल नम्बर ‘M’ बाट सुरु भएको छ भने त्यो पूर्ण रूपमा नयाँ फोन हो। तर यदि ‘N’ बाट सुरु भएको छ भने फोनको कुनै पार्ट फेरिएको छ र ‘F’ बाट सुरु भएको छ भने त्यो ‘रिफर्बिस्ड’ अर्थात् मर्मत गरेर पुनः प्याक गरिएको फोन हो भन्ने बुझ्नुपर्छ।
आईफोनको स्क्रिन सक्कली हो कि होइन भनेर थाहा पाउने अर्को सजिलो तरिका ‘ट्रु टोन’ (True Tone) फिचर चेक गर्नु हो। कन्ट्रोल प्यानल तल सारेर ब्राइटनेसको बटनलाई केही बेर थिच्दा यदि त्यहाँ ‘True Tone’ को विकल्प देखिँदैन भने उक्त फोनको स्क्रिन नक्कली हो वा बाहिर कतै फेरिएको हो भन्ने कुरा निश्चित हुन्छ। यी साना तर प्रभावकारी तरिकाहरू अपनाउँदा उपभोक्ताहरू ठगीबाट जोगिन सक्छन्।
