नयाँ दिल्ली । भारतको नयाँदिल्लीस्थित लालकिल्ला नजिक नोभेम्बर २०२५ मा भएको कार विस्फोटमा अलकायदासँग सम्बन्धित संगठन ‘अलकायदा इन द इन्डियन सबकन्टिनेन्ट’ (एक्यूआईएस) संलग्न रहेको संयुक्त राष्ट्रसंघ सुरक्षा परिषद्को पछिल्लो रिपोर्टले जनाएको छ।
संयुक्त राष्ट्र सुरक्षा परिषद्को ‘एनालिटिकल सपोर्ट एन्ड स्यान्क्सन्स मोनिटरिङ टिम’को ३८औँ रिपोर्ट सोमबार सार्वजनिक भएको हो। रिपोर्टमा एक्यूआईएस दक्षिण एसियामा सक्रिय क्षेत्रीय आतंकवादी संगठनका रूपमा विस्तार भइरहेको उल्लेख छ।
यसअघि सार्वजनिक भएको सुरक्षा परिषद्को ३७औँ रिपोर्टमा भने लालकिल्ला नजिकको उक्त विस्फोटलाई जैश–ए–मोहम्मदसँग जोडिएको थियो। पछिल्लो रिपोर्टमा भने घटनामा एक्यूआईएसको संलग्नता उल्लेख गरिएको छ।
भारतको नेसनल इन्भेस्टिगेसन एजेन्सी (एनआईए) ले पनि मे २०२६ मा अदालतमा दायर गरेको करिब ७ हजार ५०० पृष्ठको आरोपपत्रमा घटनामा संलग्न अभियुक्तहरू अलकायदाको भारतीय उपमहाद्वीप शाखासँग सम्बन्धित ‘अन्सार गजवत–उल–हिन्द’सँग जोडिएको जनाएको थियो।
नोभेम्बर २०२५ मा साँझ करिब ७ बजे दिल्लीको लालकिल्ला नजिक गुडिरहेको हुन्डाई आई२० कारमा शक्तिशाली विस्फोट भएको थियो। कार उमर नबीले चलाइरहेका थिए। उनलाई आत्मघाती आक्रमणकारी भएको आशंका गरिएको थियो। विस्फोटमा उनको समेत मृत्यु भएको थियो।
घटनामा ११ जनाको मृत्यु हुनुका साथै दुई दर्जनभन्दा बढी घाइते भएको बताइएको छ। एनआईएको अनुसन्धानअनुसार घटनामा संलग्न समूहमा चिकित्सकसहितका व्यक्तिहरू पनि थिए।
यूएनएससीको पछिल्लो रिपोर्टले एक्यूआईएसले आफ्नो गतिविधिका लागि सामग्री आपूर्ति र आर्थिक कारोबारसँग सम्बन्धित सञ्जाल निर्माण गरिरहेको जनाएको छ। संगठनले ठूलो समूहका रूपमा भन्दा साना र छुट्टाछुट्टै सेलमार्फत गतिविधि सञ्चालन गरिरहेको रिपोर्टमा उल्लेख छ।
एक्यूआईएसले बंगलादेशलाई समेत आफ्ना गतिविधिका लागि आधार बनाउन खोजिरहेको भन्दै रिपोर्टले चिन्ता व्यक्त गरेको छ।
रिपोर्टले अलकायदा र इस्लामिक स्टेट (आईएसआईएल)सँग सम्बन्धित समूहहरूले रासायनिक तथा जैविक हतियारप्रति लामो समयदेखि रुचि राख्दै आएको समेत उल्लेख गरेको छ। यस्ता हतियारसँग सम्बन्धित सामग्री तथा निर्देशन अनलाइनमार्फत आतंकवादी समूहहरूबीच फैलिरहेको रिपोर्टमा जनाइएको छ।
विशेषगरी आईएसआईएलले विषालु पदार्थ रिसिनसँग सम्बन्धित सामग्रीमा चासो देखाएको र त्यसको उत्पादनसम्बन्धी निर्देशनसमेत साझा गरेको रिपोर्टमा उल्लेख छ।
यसैबीच, लालकिल्ला विस्फोटसम्बन्धी मुद्दामा एनआईएले ११ अभियुक्तविरुद्ध करिब ७ हजार ५०० पृष्ठको आरोपपत्र दायर गरेको छ। दिल्लीको राउस एभेन्यु कोर्टले आरोपपत्रमाथि सुनुवाइका लागि अगस्ट २७ को मिति तोकेको छ। अभियोजन पक्षले ५८० भन्दा बढी साक्षीको सूची पेस गरेको छ।
