काठमाडौं — इरानी मिसाइल प्रहारपछि इजरायलको तेलअविवस्थित अमेरिकी दूतावासको शाखा कार्यालय नजिकै सामान्य क्षति पुगेको छ। अमेरिकी राजदूत माइक हक्काबीले घटनामा अमेरिकी कर्मचारीहरू सुरक्षित रहेको जानकारी दिएका छन्।
राजदूत हक्काबीले सामाजिक सञ्जालमार्फत दूतावास परिसरमा प्रत्यक्ष मिसाइल प्रहार नभएको र नजिकै भएको विस्फोटबाट उत्पन्न ध्वनि तरंग (कन्कसन) का कारण केही भौतिक क्षति भएको बताएका छन्।
उनका अनुसार घटनामा कुनै अमेरिकी कर्मचारी घाइते भएका छैनन्। सुरक्षा सतर्कताका कारण तेलअविवस्थित अमेरिकी दूतावास शाखा र कन्सुलर सेवा अस्थायी रूपमा बन्द गरिएको छ भने अमेरिकी सरकारी कर्मचारी तथा उनीहरूका परिवारलाई सुरक्षित स्थानमा रहन निर्देशन दिइएको छ।
यो घटना अमेरिका र इरानबीच बढ्दो सैन्य तनावका बीच भएको हो। पछिल्लो समय इरान, इजरायल र अमेरिकाबीच मिसाइल तथा हवाई आक्रमणका घटनाहरू बढ्दै गएका छन्।
अमेरिका र इजरायलले इरानमाथि संयुक्त सैन्य कारबाही गरेपछि इरानले इजरायल तथा मध्यपूर्व क्षेत्रमा रहेका अमेरिकी सहयोगी मुलुकका क्षेत्रमा मिसाइल आक्रमण गरेको बताइएको छ।
यसअघि केही समयका लागि युद्धविरामको प्रयास भए पनि दुवै पक्षबीचको तनाव पूर्ण रूपमा अन्त्य हुन सकेको छैन। पछिल्लो समय अमेरिकाले इरानी गतिविधिलाई लिएर सैन्य कारबाही तीव्र बनाएको र इरानले पनि अमेरिकी तथा सहयोगी मुलुकका आधारहरूलाई निशाना बनाउँदै आएको दाबी गरिएको छ।
अमेरिकी राष्ट्रपति डोनाल्ड ट्रम्पले अस्थायी युद्धविराम सम्झौता कमजोर बनेको उल्लेख गर्दै वार्ता जारी राख्ने संकेत दिएका छन्। यद्यपि, उनले दीर्घकालीन समाधानको सम्भावनाप्रति आशंका व्यक्त गरेका छन्।
