काठमाडौँ । अमेरिकी राष्ट्रपति डोनाल्ड ट्रम्पको प्रत्यक्ष हस्तक्षेपपछि अमेरिकी स्ट्राइकर फोलारिन बालोगुनमाथि लागेको एक खेलको प्रतिबन्ध निलम्बन गरिएको दाबी सार्वजनिक भएपछि विश्व फुटबलमा विवाद चर्किएको छ।
अन्तर्राष्ट्रिय समाचार संस्था रोयटर्सका अनुसार बोस्निया–हर्जेगोभिनाविरुद्धको खेलमा रेड कार्ड पाएपछि बालोगुन बेल्जियमविरुद्धको अन्तिम १६ को खेल गुमाउने अवस्थामा थिए। तर ट्रम्पले फिफा अध्यक्ष जियानी इन्फान्टिनोलाई फोन गरेर निर्णय पुनरावलोकन गर्न आग्रह गरेपछि फिफाले प्रतिबन्ध निलम्बन गरेको बताइएको छ।
फिफाले विज्ञप्तिमार्फत अनुशासन संहिताको धारा २७ अनुसार बालोगुनको एक खेलको प्रतिबन्ध एक वर्षको परीक्षण अवधिसम्मका लागि निलम्बन गरिएको जनाएको छ। यदि उनले सो अवधिमा पुनः गम्भीर अनुशासनहीनता दोहोर्याए भने अहिले रोकिएको प्रतिबन्ध स्वतः लागू हुने फिफाले स्पष्ट पारेको छ।
निर्णयपछि ट्रम्पले आफ्नो ट्रुथ सोसलमार्फत फिफालाई धन्यवाद दिँदै “सही निर्णय गर्दै ठूलो अन्याय सच्याएकोमा धन्यवाद” लेखेका छन्। ह्वाइट हाउसले पनि निर्णयप्रति खुशी व्यक्त गरेको छ।
यससँगै बालोगुन सोमबार बेल्जियमविरुद्ध हुने अन्तिम १६ को खेल खेल्न पाउने भएका छन्। अमेरिकी कप्तान क्रिस्टियन पुलिसिकले बालोगुन उपलब्ध हुने खबरले टोलीमा उत्साह थपिएको बताएका छन्। प्रतियोगितामा तीन गोल गरिसकेका बालोगुन अमेरिकाका प्रमुख खेलाडी मानिन्छन्।
सामान्यतया विश्वकपमा रेड कार्डपछि स्वतः लाग्ने एक खेलको प्रतिबन्धविरुद्ध अपिल गर्ने व्यवस्था हुँदैन। यसअघि कतारका खेलाडी असिम माडिबोको प्रतिबन्ध उल्टै बढाइएको उदाहरणसमेत रहेको छ।
यही कारण बालोगुनको प्रतिबन्ध निलम्बन गर्ने फिफाको निर्णयलाई लिएर आलोचना बढेको छ। धेरैले सह-आयोजक राष्ट्र अमेरिकालाई विशेष सुविधा दिइएको आरोप लगाएका छन्।
रोयल बेल्जियम फुटबल एसोसिएसनले निर्णयप्रति आश्चर्य व्यक्त गर्दै यसले नियमको सिधा उल्लंघन गरेको दाबी गरेको छ। संघले कानुनी विकल्पहरूबारे समेत अध्ययन गरिरहेको जनाएको छ। उनीहरूको भनाइमा यसअघि रेड कार्ड पाएका अन्य खेलाडीले प्रतिबन्ध भोग्नुपरेको थियो, तर अमेरिकाको हकमा नियम किन फरक रूपमा लागू गरियो भन्ने प्रश्न उठेको छ।
यद्यपि फिफाले अनुशासन संहिताको धारा २७ ले अनुशासन समितिलाई कुनै पनि सजायको कार्यान्वयन पूर्ण वा आंशिक रूपमा निलम्बन गर्ने अधिकार दिएको भन्दै आफ्नो निर्णयको बचाउ गरेको छ।
बालोगुनले बोस्निया–हर्जेगोभिनाविरुद्ध अमेरिकाको २–० को जितमा आफ्नो तेस्रो गोल गरेका थिए। तर दोस्रो हाफमा तारिक मुहरेमोभिचमाथि खुट्टाले प्रहार गरेको घटनापछि भीएआर समीक्षा गर्दै रेफ्रीले उनलाई सिधा रातो कार्ड देखाएका थिए।
प्रशिक्षक माउरिसियो पोचेटिनोले पनि निर्णयको समर्थन गर्दै फुटबल समुदायका अधिकांशले उक्त रेड कार्डलाई कठोर सजाय मानेको र विगतमा पनि यस्ता प्रतिबन्ध निलम्बन भएका उदाहरण रहेको बताएका छन्।
