ह्वाइट हाउसको सुरक्षा घेरामा शनिबार साँझ भीषण गोली हानाहान भएको छ, जसका कारण एकजना संदिग्ध बन्दुकधारीको मृत्यु भएको छ भने एक निर्दोष सर्वसाधारण घाइते भएका छन्।

वासिङ्टन डिसीस्थित ह्वाइट हाउस नजिकैको १७औं स्ट्रिट र पेन्सिलभेनिया एभिन्युमा शनिबार साँझ करिब ६ बजे एक व्यक्तिले अचानक आफ्नो झोलाबाट हतियार निकालेर सुरक्षा चेकपोइन्टमा खटिएका अधिकारीहरूलाई लक्षित गरी जथाभाबी गोली चलाउन सुरु गरेका थिए। अमेरिकी सिक्रेट सर्विसले जारी गरेको विज्ञप्ति अनुसार, सुरक्षाकर्मीहरूले तत्काल जवाफी कारबाही गर्दा ती संदिग्ध बन्दुकधारी गम्भीर घाइते भएका थिए र अस्पतालमा उपचारका क्रममा उनको मृत्यु भएको छ।

प्रहरी स्रोतका अनुसार घटनास्थलमा १५ देखि ३० राउन्ड गोली चलेको आवाज सुनिएको थियो। उक्त घटनामा परी एक सर्वसाधारण पनि घाइते भएका छन्, जसको अवस्थाबारे थप विवरण आउन बाँकी छ। घटनाको समयमा राष्ट्रपति डोनाल्ड ट्रम्प ह्वाइट हाउसमै थिए, तर उनी सुरक्षित रहेको र घटनाबाट प्रभावित नभएको सिक्रेट सर्विसले स्पष्ट पारेको छ।

गोलीबारीको आवाज सुन्नासाथ ह्वाइट हाउस परिसरको ‘नर्थ लन’ मा रहेका पत्रकार र कर्मचारीहरूलाई सुरक्षाकर्मीहरूले तत्काल प्रेस ब्रिफिङ रुममा सुरक्षित रूपमा स्थानान्तरण गर्दै ह्वाइट हाउसलाई केही समयका लागि लकडाउन गरिएको थियो। स्थानीय समय अनुसार साँझ ६:४५ बजे लकडाउन हटाइएको छ।

घटनापछि एफबीआई (FBI) र स्थानीय सुरक्षा निकायहरूले संयुक्त रूपमा अनुसन्धान अघि बढाएका छन्। मारिने संदिग्धको पहिचान २१ वर्षीय नासिर बेस्टका रूपमा भएको छ। केही महिनायता ह्वाइट हाउस र त्यस वरपरका क्षेत्रमा शृङ्खलाबद्ध सुरक्षा चुनौतीहरू बढ्दै गएका छन्, जसले अमेरिकी प्रशासनको सुरक्षा सतर्कतालाई थप कडा बनाउन बाध्य पारेको छ।