२० असार, काठमाडौं — लोकप्रिय हास्य रियालिटी शो **‘कमेडी च्याम्पियन’**को चौथो सिजनका लागि प्रस्तोताको टुंगो लागेको छ। यसपटक पूर्वमिस नेपाल तथा टेलिभिजन प्रस्तोता नम्रता श्रेष्ठ र चर्चित कमेडियन मेक्सम गौडेलले संयुक्त रूपमा शो सञ्चालन गर्ने भएका छन्।
शुक्रबार आयोजित कार्यक्रममा नम्रतालाई आधिकारिक रूपमा होस्टका रूपमा सार्वजनिक गरिएको हो। यसअघि उनी ‘कमेडी दरबार’ र ‘लोकस्टार’ जस्ता टेलिभिजन कार्यक्रमको सफल प्रस्तोताका रूपमा परिचित छिन्। उनको प्रस्तुति शैली, स्टेजमा सहज संवाद गर्ने क्षमता र मनोरञ्जन क्षेत्रमा रहेको अनुभवलाई मध्यनजर गर्दै ‘कमेडी च्याम्पियन’को नयाँ सिजनका लागि छनोट गरिएको निर्माण पक्षले जनाएको छ।
यसअघिका तीनवटै सिजन होस्ट गरेकी रीमा विश्वकर्मा प्रतिनिधिसभा सदस्य निर्वाचित भएपछि कार्यक्रममा निरन्तरता दिन नसक्ने भएकाले उनको स्थानमा नम्रताको प्रवेश भएको हो। मेक्सम गौडेल भने हास्य कलाकारका रूपमा स्थापित नाम हुन्। कमेडी र स्टेज प्रस्तुतिमा उनको अनुभवले शोलाई थप मनोरञ्जनात्मक बनाउने अपेक्षा गरिएको छ।
निर्देशक विशाल भण्डारीका अनुसार ‘कमेडी च्याम्पियन’को चौथो सिजन आगामी साउनको पहिलो सातादेखि हिमालय टेलिभिजनमार्फत प्रसारण हुनेछ। यसपटक देशभरबाट डेढ सयभन्दा बढी प्रतिभाले अडिसन दिएका छन्, जसबाट उत्कृष्ट प्रतिस्पर्धी छनोट गरी मुख्य प्रतिस्पर्धामा सहभागी गराइनेछ।
निर्माण टिमका अनुसार यस सिजनमा नयाँ प्रतिभालाई अवसर दिनुका साथै प्रस्तुतिको स्तरलाई अझ परिष्कृत बनाउने तयारी गरिएको छ। प्रतियोगितामा स्ट्यान्डअप कमेडीका विभिन्न शैली समेटिने र दर्शकलाई नयाँ अनुभव दिने गरी कार्यक्रमको ढाँचा तयार पारिएको बताइएको छ।
कार्यक्रमका निर्णायक (जज)हरूको नाम भने अझै सार्वजनिक गरिएको छैन। निर्देशक भण्डारीले जजहरूको घोषणा छिट्टै गरिने जानकारी दिएका छन्।
नेपालमा स्ट्यान्डअप कमेडीलाई स्थापित गर्न महत्वपूर्ण भूमिका खेलेको ‘कमेडी च्याम्पियन’ले अघिल्ला सिजनमार्फत धेरै नयाँ कलाकारलाई राष्ट्रिय पहिचान दिलाएको थियो। चौथो सिजनमा नयाँ होस्ट, नयाँ प्रतिभा र नयाँ प्रस्तुतिसँगै शोले दर्शकको अपेक्षा पूरा गर्ने निर्माण पक्षको विश्वास छ।
