काठमाडौं, असार १५ — सह–आयोजक क्यानडाले दक्षिण अफ्रिकालाई १–० ले पराजित गर्दै पहिलो पटक विश्वकप फुटबलको अन्तिम १६ मा स्थान बनाएको छ।
रोमाञ्चक प्रतिस्पर्धामा खेल अतिरिक्त समयमा धकेलिने संकेत देखिएको थियो। तर, इन्जुरी समयको दोस्रो मिनेटमा कप्तान स्टेफन इस्टाकियोले पेनाल्टी क्षेत्रको छेउबाट गरेको उत्कृष्ट प्रहार गोलमा परिणत भएपछि क्यानडाले ऐतिहासिक जित हात पार्यो।
यसअघि विश्वकपमा खेलेका सबै ६ खेल गुमाएको क्यानडाले यस संस्करणमा उल्लेखनीय प्रदर्शन गर्दै इतिहास रचेको हो। जुन १८ मा कतारलाई ६–० ले पराजित गर्दै विश्वकपमा पहिलो जित निकालेको क्यानडा यस जितसँगै नकआउट चरण पुग्ने पहिलो टोली बनेको छ।
अब क्यानडाले जुलाई ४ मा हुने अन्तिम १६ को खेलमा नेदरल्यान्ड्स वा मोरक्कोमध्ये एकसँग प्रतिस्पर्धा गर्नेछ।
जितपछि क्यानडाका मुख्य प्रशिक्षक जेसी मार्सले खेलाडीहरूको प्रशंसा गर्दै उनीहरूलाई देशका नायकको संज्ञा दिए। उनले खेलाडीहरूको समर्पण र चरित्रले क्यानडाली फुटबलको भविष्य उज्ज्वल बनाएको बताए।
क्यानडाका लागि अर्को सकारात्मक पक्ष भनेको स्टार विङ्गर अल्फोन्सो डेभिसको पुनरागमन रह्यो। ह्यामस्ट्रिङ चोटका कारण समूह चरणका खेल गुमाएका डेभिसले मैदान प्रवेश गरेपछि टोलीको आक्रमणलाई थप प्रभावकारी बनाएका थिए।
यता, समूह ‘ए’ मा दोस्रो स्थानमा रहेको दक्षिण अफ्रिकाले अपेक्षाअनुसार प्रदर्शन गर्न सकेन। पूरै खेलमा उसले लक्ष्यमा एक मात्र प्रहार गर्न सफल भयो र अन्ततः इन्जुरी समयमा गोल खाँदै प्रतियोगिताबाट बाहिरियो।
