काठमाडौंमा आज घोडेजात्रा पर्व भव्य रूपमा मनाइँदैछ। प्रत्येक वर्ष चैत कृष्ण औँसीका दिन मनाइने यो पर्व विशेषगरी काठमाडौं उपत्यकामा धूमधामका साथ मनाउने गरिन्छ।
घोडेजात्राको मुख्य आकर्षण टुँडिखेल मा हुने नेपाली सेनाको घोडा प्रदर्शन हो। आज आयोजित कार्यक्रममा नेपाली सेनाले विभिन्न प्रकारका घोडा कला, युद्धक अभ्यास तथा आकर्षक खेल प्रस्तुत गर्ने कार्यक्रम रहेको छ।
यस पर्वसँग एउटा धार्मिक र सांस्कृतिक विश्वास पनि जोडिएको छ। प्रचलित किंवदन्तीअनुसार टुँडिखेल क्षेत्रमा बस्ने ‘गुरुमापा’ नामक राक्षसको मृत्यु भएपछि उसको आत्मालाई दबाइराख्न घोडा दौडाउने परम्परा सुरु भएको मानिन्छ। त्यसैले आजको दिन घोडा दौडाएर उसको आत्मा पुनः सक्रिय हुन नदिने विश्वास रहिआएको छ।
घोडेजात्राको अवसरमा सरकारले काठमाडौं उपत्यकामा सार्वजनिक बिदा दिएको छ। साथै, उपत्यकाका विभिन्न स्थानमा मेला, पूजा तथा सांस्कृतिक कार्यक्रमहरू पनि आयोजना गरिएका छन्।
आजको कार्यक्रममा उच्च पदस्थ सरकारी अधिकारी, कूटनीतिक नियोगका प्रतिनिधि तथा सर्वसाधारणको उल्लेख्य उपस्थिति रहने अपेक्षा गरिएको छ।
