टोरन्टो — फिफा विश्वकप २०२६ को अन्तिम १६ अन्तर्गत बिहीबार हुने क्रोएसिया र पोर्चुगलबीचको खेल केवल अर्को नकआउट प्रतिस्पर्धा मात्र हुने छैन। यो खेलसँगै विश्व फुटबलका दुई महान् खेलाडी लुका मोड्रीच र क्रिस्टियानो रोनाल्डोमध्ये एकको विश्वकप यात्रा पनि अन्त्य हुने निश्चित भएको छ।
दुवै खेलाडीका लागि यो सम्भावित अन्तिम विश्वकप मानिएकाले टोरन्टो स्टेडियममा हुने प्रतिस्पर्धाले विशेष चर्चा पाएको छ। खेलअघि नै टोरन्टोका सडकमा पोर्चुगल र क्रोएसियाका समर्थकहरूको उल्लेख्य उपस्थिति देखिएको छ। क्यानडाको राष्ट्रिय दिवसको अवसरसमेत परेकाले सहरमा उत्सवमय वातावरण छ।
पोर्चुगलका समर्थकहरूले टोली बोकेको बसको स्वागत गर्न मुख्य सडकमा भेला हुँदा केहीबेर यातायातसमेत प्रभावित भएको थियो।
दुवै टोलीको हालसम्मको प्रदर्शनलाई हेर्दा खेल निकै प्रतिस्पर्धात्मक हुने अपेक्षा गरिएको छ। पोर्चुगलले प्रतियोगिताभर स्थिर प्रदर्शन गर्न नसकेको बेला क्रोएसियाले पनि इंग्ल्याण्डविरुद्ध अपेक्षाअनुसारको प्रदर्शन गर्न सकेको थिएन।
पोर्चुगलका मुख्य प्रशिक्षक रोबर्टो मार्टिनेजले रोनाल्डो र मोड्रीचलाई फुटबलका असाधारण खेलाडीको संज्ञा दिएका छन्। “लुका मोड्रीच र क्रिस्टियानो रोनाल्डो जस्ता खेलाडीहरू चर्चाभन्दा माथि छन्। ४० वर्षको उमेरमा पनि उनीहरूले देखाइरहेको प्रदर्शनले उनीहरूलाई विशेष बनाएको छ। उमेर केवल एउटा संख्या मात्र हो,” उनले भने।
क्रोएसियाका गोलकिपर डोमिनिक लिभाकोभिचले टोलीका कप्तान मोड्रीचप्रति सम्मान व्यक्त गर्दै टोली उनको विश्वकप यात्रा अझै लम्ब्याउने लक्ष्यका साथ मैदान उत्रिने बताए।
रोनाल्डो र मोड्रीचले सन् २०१२ देखि २०१८ सम्म स्पेनिस क्लब रियल म्याड्रिडबाट सँगै खेल्दै च्याम्पियन्स लिगसहित अनेकौं महत्वपूर्ण उपाधि जितेका थिए। मैदानबाहिर पनि उनीहरूबीच घनिष्ठ मित्रता र पारस्परिक सम्मान रहेको छ।
आगामी सेप्टेम्बरमा मोड्रीच ४१ वर्ष पुग्नेछन् भने रोनाल्डो पनि ४१ वर्षकै छन्। रोनाल्डोले यसअघि नै विश्वकप २०२६ आफ्नो अन्तिम विश्वकप हुने संकेत गरिसकेका छन् भने मोड्रीचले पनि आफ्नो अन्तर्राष्ट्रिय करियरको यो विशेष चरण रहेको स्वीकार गरेका छन्।
यस कारण टोरन्टोमा हुने यो प्रतिस्पर्धा केवल क्वार्टरफाइनल प्रवेशका लागि मात्र नभई विश्व फुटबलका एक युगको सम्भावित अन्त्यको साक्षीका रूपमा पनि स्मरणीय बन्ने अपेक्षा गरिएको छ।
