नेपाल अब अमेरिकी पर्यटकका लागि विश्वकै एक उत्कृष्ट र सुरक्षित गन्तव्यका रूपमा स्थापित हुने मार्गमा अघि बढेको छ। संयुक्त राज्य अमेरिकाले नेपालका लागि आफ्नो ‘ट्राभल एडभाइजरी’ (यात्रा सल्लाह) को स्तर घटाएसँगै नेपाल भ्रमण गर्न चाहने अमेरिकी नागरिकहरूमा उत्साह थपिएको हो। यसअघि उच्च जोखिमको सूचीमा रहेको नेपाललाई अहिले अमेरिकी सरकारले ‘बढेको सावधानी अपनाउनुहोस्’ (Exercise Increased Caution) श्रेणीमा राखेको छ, जसले नेपालको सुरक्षा अवस्था मजबुत र स्थिर रहेको प्रमाणित गर्दछ।
सुरक्षामा सुधार र विश्वव्यापी सन्देश
अमेरिकी विदेश मन्त्रालयले समय-समयमा गर्ने यस्तो मूल्याङ्कनलाई विश्वभरका पर्यटकहरूले निकै महत्वका साथ हेर्ने गर्छन्। नेपालको शान्ति सुरक्षा, राजनीतिक स्थिरता र पर्यटकका लागि उपलब्ध गराइएको सुरक्षित वातावरणका कारण यो स्तर घटाइएको हो। यस निर्णयले केवल अमेरिका मात्र नभई अन्य पश्चिमा मुलुकहरूका पर्यटकलाई समेत नेपाल सुरक्षित छ भन्ने बलियो र सकारात्मक सन्देश प्रवाह गरेको छ।
अन्तर्राष्ट्रिय जगतमा नेपालको छवि सुध्रिनुले नेपाल अब एड्भेन्चर र सांस्कृतिक पर्यटनका लागि मात्र नभई पारिवारिक भ्रमणका लागि पनि उत्तिकै योग्य रहेको देखाउँछ। सुरक्षाका दृष्टिकोणले ढुक्क भएपछि अब ठूलो सङ्ख्यामा उच्च खर्च गर्ने पर्यटकहरू नेपाल आउने बाटो खुलेको छ।
पर्यटन र अर्थतन्त्रमा सुनौलो अवसर
यो नयाँ विकासले नेपालको सुस्ताएको पर्यटन क्षेत्रमा नयाँ प्राण भर्ने अपेक्षा गरिएको छ। विशेषगरी ट्रेकिङ, पर्वतारोहण र सांस्कृतिक पदयात्रामा रुचि राख्ने अमेरिकी पर्यटकहरूको संख्या बढ्दा होटल, रेस्टुरेन्ट र स्थानीय ट्राभल एजेन्सीहरूलाई ठूलो फाइदा पुग्नेछ। पर्यटकको आगमन बढ्नु भनेको मुलुकको वैदेशिक मुद्रा सञ्चितिमा वृद्धि हुनु र हजारौँको संख्यामा नयाँ रोजगारी सिर्जना हुनु हो।
विगतका वर्षहरूमा कोभिड र अन्य विविध कारणले पर्यटन क्षेत्रले व्यहोरेको घाटालाई यो सकारात्मक निर्णयले पूर्ति गर्न सहयोग पुर्याउनेछ। यदि सरकार र निजी क्षेत्रले यस अवसरलाई सही रूपमा सदुपयोग गर्दै थप प्रवद्र्धनात्मक कार्यक्रमहरू ल्याउन सकेमा नेपाल अमेरिकी पर्यटकहरूको निर्विकल्प गन्तव्य बन्न सक्ने देखिन्छ।
