काठमाडौँ — नेपालमा प्रतिबन्धित डिजिटल मुद्रा (क्रिप्टोकरेन्सी) को अवैध कारोबारमा संलग्न रहेको आरोपमा प्रहरीले तीन जनालाई पक्राउ गरेको छ। काठमाडौँ उपत्यका अपराध अनुसन्धान कार्यालयको टोलीले झन्डै १ अर्ब ३७ करोड रुपैयाँ बराबरको कारोबार गर्ने गिरोहका सदस्यहरूलाई नियन्त्रणमा लिएको हो। पक्राउ पर्नेहरूमा भारतीय नागरिक प्रवेश अलीसहित नेपाली नागरिकहरू नरेश रेउले र दिप्ती पोखरेल रहेका छन्।
प्रहरीका अनुसार यो गिरोहले ‘बिनान्स’ (Binance) प्लेटफर्मको प्रयोग गरी ठुलो परिमाणमा युएसडिटी (USDT) खरिद-बिक्री गर्ने गरेको पाइएको छ। विशेष सूचनाका आधारमा सामाखुसीबाट सुरुमा नरेश रेउले पक्राउ परेका थिए। उनको बयानका आधारमा प्रहरीले १५ लाख ३० हजार रुपैयाँ नगदसहित दिप्ती पोखरेल र ललितपुरको एकान्तकुनाबाट मुख्य कारोबारी भनिएका प्रवेश अलीलाई नियन्त्रणमा लिन सफल भएको हो।
मोबाइल एपबाटै अर्बौँको खेल
प्रारम्भिक अनुसन्धानका क्रममा पक्राउ परेका भारतीय नागरिक प्रवेश अलीको मोबाइलबाट मात्रै १ अर्ब ३६ करोड ८० लाख ४५ हजार ५ सय ८० रुपैयाँ बराबरको कारोबार भएको तथ्य फेला परेको छ। उनले लामो समयदेखि हुन्डी र क्रिप्टोको जालो फैलाएर अवैध रूपमा रकम स्थानान्तरण गर्ने गरेको प्रहरीको दाबी छ। पक्राउ परेका तीनै जनालाई थप अनुसन्धान र कानुनी कारबाहीका लागि जिल्ला प्रहरी परिसर काठमाडौँ पठाइएको छ।
नेपाल राष्ट्र बैंकले क्रिप्टोकरेन्सीलाई पूर्णतः अवैध घोषणा गरे पनि पछिल्लो समय प्रविधिको दुरुपयोग गरी यस्ता कारोबार बढ्दै गएका छन्। प्रहरीले यस्ता शङ्कास्पद आर्थिक गतिविधिमा संलग्न नहुन र अपरिचित व्यक्तिमार्फत हुने डिजिटल कारोबारबाट जोगिन सर्वसाधारणलाई आग्रह गरेको छ।
